O loo iai lipoti ua ta’ua ai lapataiga mai ia i latou e tele le tomai i le itu tau le soifua maloloina ua o latou ta’ua ai o loo taulalata nei Niu Sila i le aafia i se pepesiga o le faamai o le misela ona o le maualalo o le aofai o i latou ua faia tuipuipui o lea faamai aemaise le faatupulaia o cases poo i latou e malaga mai i le atunuu ua aafia i le misela.
O le lipoti aupito lata mai mai le Public Health Communications Center ma le alii polofesa o Michael Baker, ua ta’ua ai e iai faamaoniga o loo iai le atunuu i se tulaga maaleale mai le misela. Na o latou lapatai e ono oo i le faitau afe nisi e aafia, taofia i falemai ma tigaina aafiaga ma ono ai ina ma’umau soifua mai le misela ma e iai laasaga ua alagatatau nei ona faia aemaise lava i latou e lei faia ni tuipuipui.
E faaopoopo atu i lea le manaomia ona faatino o le tulaga lea i le fanau aemaise lava tamaiti Maoli ma le Pasefika ma nai isi komiuniti.
Ua ta’ua o le pepesiga mulimuli o le misela e toeitiiti 800 tagata na taofia ai i le falemai.
O le isi foi itu na o latou ta’ua, afai nei ae pepesi le misela i le atunuu o lona uiga o le a lamatia foi le soifua o nai atunuu tuaoi o le Pasefika e pei foi ona aafia ai Samoa i le 2019.
