I le oo mai ai o faamatalaga i le faaopoopo atu o le numera o tagata i le misela i lenei vaiaso, o lea ua faaalia popolega a se tasi o foma’i mo fanau – pediatrician i totonu o le atunuu, i tulaga mā’ale’ale o loo iai nei Niu Sila mai le faama’i o le misela.
Ua ia manatu, o le maua ai o i latou ua aafia, ua faailoa mai ai o loo pepesi le vairusi i totonu o Niu Sila e aunoa ma le silafia e le to’atele ma le malamalama o loo aafia nisi o loo o latou fesoota’i atu iai.
I faamaumauga mai le Health New Zealand i le maua ai o ē ua aafia, e lē o mailoa pe o nisi na pesia mai tagata na mua’i aafia i le faama’i.
Faamauia e le ta’ita’ifono o le Komiti o loo faatautaia vaega uma o tuipuipui, Dr Owen Sinclair, o lona iloa i faamaumauga o nei ma’i o tagata na pesia mai lava i totonu o le atunuu (community transmission); ae le’i ma’i mai i se aafiga a o iai i atunuu i fafo.
O le popolega tele, o le pepesi atu o le misela i nofoaga ma faaitu o le atunuu o loo maualalo ai lava le numera o ē ua fai tuipuipui; e aofia ai Aukilani ma Waikato.
Faamauina o faaitu o loo to’atele ai tagata Māori, o ē o loo māua o loo i tulaga ma’ale’ale.
E ui e lē o vaoia le to’atele o nisi ua oo atu i falema’i mo togafitiga mo lenei faama’i, ae ua lapata’ia e Sinclair le ono vaaia o le tumutumu atu o maota gasegase, pe afai ae faaauau pea le pepesi o le misela.
