O le konesula mai le atunuu o Nepal ua ia lapatai mai i le faatupulaia o le aofai o tagata malaga mai i le atunuu o loo aafia i faiga taufaavalea e faatatau i le faatauina o visa e faigaluega ai i Niu Sila nei.
Fai mai tusitusiga i le RNZ o le faamatalaga lea mai loia a le Immigration faapea faufautua i nei auaunaga lea na o latou faailoa ai i le lua masina talu ai, o tagata malaga mai i Niu Sila poo migrants ua faatonuina e totogi le oo atu i le 40 afe mo se recovery visa ma le Accredited Employer Work visa poo le (AEWV).
Ua faailoa foi e le konesula lea o Nepal i Niu Sila nei, o loo faafesootai atu foi o ia e tagata malaga nei ma faamatala atu ia te ia ua faailoa ane ia i latou e mafai ona o latou faatau ni visa tafafao poo ni visa faigaluega ma faigaluega ai i le atunuu pe a taunuu mai.
Fai mai isi ua tele tupe ua totogi i le faiga lea ae faatoa iloa ane mulimuli ua faavaleaina i latou.
Ua maua foi i isi lipoti i luga o upega tafailagi ua foliga ua faatau le visa lea e faaigoa o le recovery visa, ua faatau e pei o se visa faigaluega e tolu tausaga lona umi peitai o le mea moni e na o le ono masina.
O lea ituaiga visa na faia faapitoa ina ua manaomia nisi tagata faigaluega faaopoopo e fesoasoani i le faamamāina o le siosiomaga mai aafiaga o le afā ma lologa.
Ua faailoa e le Immigration NZ i le RNZ e iai pisinisi tau femaagaa’iga ua lipotia i leoleo i faiga faapea ma o loo faaauau nei iai suesuega.
