E gagalo gagalo toe aliali mai faiga taufaasesē e mamulu ai tupe a tagata i ituaiga o auala faapisinisi e faatosina ai le ave o seleni e teu faafaigaluega, ma le ta’utinoga e faaopoopoina ai tupe e maua, ae mulimuli ane ua alu atu ai i le vasaloloa seleni a tagata ua lē toe maua.
O lea ua aumai ai i se tulaga faalaua’itele se lapata’iga a le faletupe tutotonu o Samoa i tagata o le tatou atunuu ia mataala ma aua ne’i tosinagofie i ni faasalalauga i luga o upega tafa’ilagi o le api o foliga mai le kamupani ua ta’ua o le BG Wealth.
O lea kamupanī ua maua i sa’ili’iliga a le vaega o su’esu’ega faalilolilo a le faletupe tutotonu e lē o lesitalaina i Samoa, ma o ia foi su’esu’ega na iloa ai o loo folafola e lea kamupani lo latou teu faafaigaluega o ni seleni ae vave maua ai tupe faaopoopo poo faasiliga o tupe e teu i ni aofa’iga tetele.
Peita’i o ia faasalalauga e taufaasesē.
E pei ona silafia e lē o se taimi muamua lenei ua lapata’ia ai le atunuu i ni gaioiga faapisinisi e solitulafono auala e faatino ai.
O nisi o ia faiga taufaasesē ua gaugau ai tupe a nisi tagata ma pisinisi ma ua alu atu ai i le vasaloloa ua lē toe maua.
