Ua sau le lapataiga mai le International Monetary Fund – IMF agai i le malo o Niu Sila, e lē tatau ona soona tele tupe faaalu.
O le tala mai lea a le IMF a o taumafai le malo e toe faatulai le tamaoaiga o le atunuu.
O ni lapataiga na sau ma le lipoti faaletausaga a le IMF, ma o loo ta’ua ai foi o le taofiofi o le soona faaalu o tupe o le a taofiofi ai foi ma le taugata o oloa ma auaunaga e faatusa i le malosiaga o le tupe Niu Sila.
Ae i tupe maua, o lea lava e leotele le IMF i le tatau ona totogi lafoga mai polofiti e sau mai le faatau ese atu o aseta, capital gains.
I se tali a le minsiita o tupe, Nicola Willis, o lea lava o loo faaeteete le malo i suiga o loo vaavaai iai e aofia ai le tuu mai i lalo o lafoga totogi ina ia aua ne’i oo i se laasaga e toe moomia ai nisi tupe nonō.
Afai ae talia e le malo le lipoti, ua vavalo le IMF e toe faatulai le tamaoaiga o Niu Sila i le tusa ma le 1.1% e alu ai i luga i le tausaga fou.
