O le asō ua lapatai mai ai se tasi o faleoloa tele i Ausetalia, o Coles i le aufaatau ia nofo silafia o le a iai se sioti i le sapalai o fualaau’aina taumafamata ma fualaau faisua mo ni nai vaiaso ona o aafiaga o lea foi vaega mai lōlōga talu ai aemaise o le tau mālūlū.
Ua silafia e le to’atele lōlōga sa aafia ai Kuiniselani ma Niu Sa Uelese i se taimi e lei mamao atu ma o le a faalogoina nei aafiaga o ia tulaga faalenatura i fualaau’aina taumafamata ma fualaau faisua ua masani ai le atunuu e faatau mai faleoloa e pei o Coles.
Ui i lea faaaliga ae ua ta’ua foi e Coles o loo iai pea isi fualaau’aina taumafamata o loo tele i le taimi nei i le maketi mo le aufaatau. O le maukeni le isi o loo faailoa mai e Coles o loo taugofie pea ma talafeagai foi mo le tau mālūlū mo le fofoga taumafa o le atunuu.
O le tau o loo faatau ai fualaau i Ausetalia ua matuai faamaonia le taugata, faata’ita’iga o le lettuce ua oo atu i le 10 tala ua faatau ai i le tele o faleoloa.
