Talofa Samoa potopoto,
E le uma le agaga fa’afetai i le mamalu o Samoa e le gata i Niu Sila ae fa’apea foi i Samoa ma soo se vaega o le lalolagi mo le lagolagoina o le pili taufa’aofi i le Palemene o Niu Sila a le alii faipule ia Teanau Tuiono, le Restoring Citizenship Removed By Citizenship (Western Samoa) Act 1982 Bill. O le tulafono taufa’aofi e toe faáfoi mai ai le sitiseni Niu Sila o tagata Samoa sa ave ese fa’afuasei e Niu Sila i lana tulafono Citizenship (Western Samoa) Act 1982.
O lea ua faáiloa mai e le Ofisa o le Resitala o le Palemene o Niu Sila aso o le a folasia ai finagalo tuufofoga (oral submissions) i luma o le Governance & Administration committee. Ua na o i latou sa talosaga mo se avanoa e folasia ai finagalo tuufofoga o le a auai:
Aso Gafua 24 Iuni: Ueligitone ma i latou e faáaoga ai le zoom
Aso Lulu 26 Iuni: Ueligotone ma i latou e faáaoga ai le zoom
Aso Gafua 1 Iulai: Aukilani
O nisi nei o fa’alapotopotoga ma tagata taitoatasi ua fa’ailoa mai o le a fai a latou folasaga tuufofoga (oral submissions): Pacific Leadership Forum, Taeao o Faiva (PLF), Fono Faufautua a Samoa (Aukilani), Mafutaga Soofa’atasi Faifeau Samoa (Aukilani), ASA Foundation Trust, Tamasa Trust, Ta Tupu Foundation Trust, Waitemata Samoan Community Forum, Rev Toleafoa Leatuavao Tupai-Lavea (Ambassador for Children’s Rights of Samoa), Aigagalefili Fepuleai-Tapuai (Youth Ambassador), Angela Dalton (Auckland City Councillor), Diana Bell (Stace Hammond Lawyers) ma isi.
O le aso 15 Iuni i le Radio Samoa e fa’atalanoa ai le afioga ia Fepuleai Semi Fepuleai e le afioga ia Savea Al Harrington i le polokalame o le Tanoa Ava i le 3 i le afiafi. O loo iai foi se fa’atalanoaga a le afioga ia Fepuleai Semi Fepuleai ma Asiata Pio i le polokalame o le Tautai A’e i le Aso Gafua 17 Iuni i le itula e 5 i le afiafi.
O se avanoa e fa’afetaia ai Samoa potopoto i le lagolago i submissions sa moomia mai e Tuiono. O le afioga ia Fepuleai Semi Fepuleai o le taitaifono o le Taeao o Faiva (itupa Samoa o le Pacific Leadership Forum). O ia foi sa avea ma taitaifono o le Mau o le Sitiseni i le taumafaiga o le 2001 – 2004.
O le Aso Toonai 6 Iulai i Aukilani o le a fai ai le dinner e feiloai ma fa’asoa ai taitai o Samoa ma i latou e lagolago i le pili taufa’aofi a Tuiono mo le toe fa’afoi mai o le sitiseni Niu Sila o tagata Samoa sa aveeseina e le tulafono a Niu Sila 1982. O le a fa’ailoa ai foi fuafuaga mo feiloaiga ma vaega fa’aupufai taitasi e aofia ai le Labour Party, National Party, New Zealand First, ACT & Te Pati Māori e pei ona iai le feiloaiga ma le Green Party ia Me. O loo faápipii atu faámatalaga mo lea faámoemoe pe a fia maua sau ticket e auai i le dinner.
