A o soalaupule ai nei e le Fono Aoao faitulafono teuteuga o le faavae e faasino i le tulafono o Faamasinoga o Fanua ma Suafa o le tausaga e 2020, ua faailoa mai e le sui faipule o le itumalo o Sagaga 2 le tofa Maulolo Tavita Amosa, o le a ia lagolagoina teuteuga o le faavae e pei ona tuuina atu e le malo, ina ia toe faafoi ai le Faamasinoga o Fanua ma Suafa i le tulaga sa iai muamua aemaise o le tasi o le pulega i lalo o le Faamasino Sili.
Ma o le mea lena na tupu i le palota na pasiaina ai lea teuteuga o le faavae i le taeao nei, na palota le tofa Maulolo Tavita Amosa e lagolago le teuteuga o le tulafono.
E pei ona silafia tulaga feteena’i ma le eseese o finagalo alii ma faipule o Afega ma alii ma faipule o Leauvaa ona o mataupu tau eleele, o le mafua’aga lea ua faaalia ai e le sui faipule o Sagaga 2 ua na lagolagoina ai le toe faafoi o lea faamasinoga i le tulaga sa iai muamua a o le’i pasia teuteuga o le faavae ma le tulafono o Faamasinoga o Fanua ma Suafa i le tausaga e 2020.
O le faailoa e le tofa Maualolo Tavita Amosa o lana lagolago ua manino ai o le tasi lea o nofoa o loo mana’omia e le itu a le malo mo le fausia o le 2 vae 3 o nofoa e 53 o le Palemene e saofia ai pasia e le fono aoao faitulafono ia teuteuga o le faavae.
O loo faagasolo ona talanoaina e le Palemene ia teuteuga ma le faamoemoe e tatau ona maua iai se finagalo o le Palemene i lana fonotaga o loo faagasolo.
O se tasi o mataupu tāua o le a afea i taualumaga a le fono o teuteuga o le tulafono o faigapalota lea ua faamoemoe e mafai ai ona palota mai fafo o tatou tagatanuu e lesitala, ma faamalieina aiaiga o le agavaa e avea ma tagata palota.
O ia foi teuteuga o loo taumafai ai le malo e suia se tasi o aiaiga o le faavae faasino i nofoa o tamaitai i le faamaioio lelei o le aofa’iga e to’alima ae lē toe faaaogāina ai le 10 pasene.
