O loo matuai fia momoli le faafetai a se tasi o faipisinisi i Ueligitone i le tagata lea na agai ane i le taeao analeila ma le suō ma tutuli ese le au ram raiders poo i latou ia ua fiafia tele i le ituaiga solitulafono lea o le faaaoga o taavale e tapele ai ni nofoaga o pisinisi ma gaoia meatotino.
Ta’ua mai i lipoti a le One News ua i luga o upega tafailagi ata o le taimi na agai ane ai si tagata lea o se alii ma le suo ina ua osofai e le ausolitulafono le pisinisi o le Thirsty Liquor Island Bay i Ueligitone poo le tea laititi o le fā i le vaveao.
O ata o loo maua lelei ai le taimi na agai ane ai le tagata lea ma tutuli ese le auosofai e toatolu, fai mai lē e ana le pisinisi o le Chetan Rattan, ana leai si tagata lea semanu ua matuai telē se aafiaga i le pisinisi.
Ta’ua e Rattan o le faatolu lea ona oofaia lona faleoloa i totonu o le fā masina. Fai mai na aveese e le auosofai lea le tusa ma le afe tala o le tau o ava malosi ma faaleagaina foi se tasi vaega o le faitotoa i le pito i luma.
O se faamatalaga mai leoleo e faapea e toalima tagata na agai ese mai i le taavale lea na maua mulimuli ane ua tia’i i Houghton Bay Rd, gaoia e le augaoi lea le isi taavale ae na taofia e leoleo i Mraar ma ua pueina uma le toalima lea o loo suesue nei e leoleo.
O si alii na agai ane ma le suō e tutuli ese ai le augaoi e le o faailoa maia poo ai tonu lea tagata ae ua ta’ua na agai ane mai le isi itu o le auala o loo iai le pisinisi na osofaia.
