Ua amata ona tuu i lalo e Isaraelu le nofoaga autū o le ofisa o Malo Aufaatasi, le UNRWA poo le United Nations Relief and Works Agency i le itu i Sasa’e o Ierusalema ina ua faailoa se vaega o le tulafono ua faasā ai nisi gaioiga a le ofisa lea mo le au sulufa’i mai Palesitina.
Lipotia e le CNN o leoleo ma vaegā’au mai Isaraelu na taunuu ane i le nofoaga lea i le vaiaso nei ma masini sua eleele ma amata loa ona tuuina i lalo lea fale tele ma faamamāina le nofoaga.
O se gaioiga ua matua’i lē fiafia iai lea ofisa o Malo Aufaatasi fai mai a latou o se matua’i soliga lea o tulafono faavaomalo e le malo o Isaraelu.
Fai mai se pepa o faamatalaga mai le matāgaluega o le va i fafo a Isaraelu, o le setete o Isaraelu e umia le nofoaga lea i Ierusalema ma le isi itu ua lē o toe faaauauina ni galuega a le ofisa lea o le UNRWA i lea nofoaga ma ua lē o toe faafaigaluegaina ai foi e Malo Aufaatasi ni ana tagata faigaluega.
Ua leva lava ona finau Isaraelu o le ofisa lea o loo latou fesoasoani i le Hamas.
Puna o Faamatalaga: https://edition.cnn.com/2026/01/20/middleeast/israel-demolish-unrwa-east-jerusalem-latam-intl
