O le aso 11 o le masina o Oketopa lea ua faatulaga ai e le Faamasinoga o le a tuuina mai ai le faasalaga o le tamaitai o Retina Faitasia Tuiletufuga 36 tausaga le matua mai Tuanai ma Lotopa.
O loo ioe lea tamaitai i moliaga uma o loo faasaga ia te ia.
O se tamaitai sa galue i le Matagaluega o Pisinisi Alamanuia ma Leipa na molia ina ua ia saini faamalosi e aunoa ma se faatagana le saini a le Ofisa Sili o Pulega o le Matagaluega, e tali ai se talosaga o se laisene pisinisi a se Kamupani Saina e mafai ai ona faagaioi i totonu o Samoa.
O tolaulauga a le Faamasinoga Maualuga i le Aso Gafua i luma o le Tamaitai Sui Faamasino Sili ia Niava Mata Tuatagaloa na faatulaga mai ai loa e le Faamasinoga le aso e tolaulau ai lona faasalaga.
