Ua ioeina e se tamaitai lona aveesea faasolitulafono o se seleni e silia ma le $1miliona tala mai le faletupe o le ANZ sa galue ai.
E 305 moliaga faaiu a le itu a leoleo, o le gaoi a o avea ma tagata faigaluega ua ioeina e se tamaitai sa galue i se tasi o faletupe a le atunuu.
I le uluai valaauga o lenei mataupu e 330 moliaga, peitai i le vaiaso lenei na talosaga ai le itu a leoleo e toe faaui i tua moliaga e 25.
O lenei mataupu na aliae mai ina ua faatino galuega suetusi a le faletupe mo le tausaga 2022 ma iloa ai le telē o le seleni o loo alu ese mai i le faletupe, ma na logoina loa leoleo ma amata ai suesuega.
Na maua i suesuega a leoleo, o loo masalomia, o gaioiga a lea tamaitai na amata mai i le va o le aso 8 o Tesema 2018 ma le aso 4 o Aokuso o le tausaga e 2022, ma o loo masalomia na faia e lea tamaitai ni nonogatupe i ni auala taufaasese ma ia talaina ai ni siaki tupe.
O le aofai o le seleni o loo masalomia na aveese faasolitulafono e lea tamaitai mai le faletupe sa galue ai e tusa ma le $1.5miliona tala.
O loo tatala lea tamaitai i tua, e tālia ai le aso 5 o Fepuari o le tausaga fou e faia ai lona faamasinoga i moliaga e 25 o loo ia teena.
