Ua aumai faalaua’itele se finagalo tusitusia o le afioga i le Faipule o le itumalo o Aana Alofi 1 o ia foi o le ta’ita’ifono o le komiti o le Fono Faavae a lea itumalo faapalota, le tofa Fesola’i Tusiupu Tuigamala ua tali ai i matāupu ua fesiligia ai lana ta’ita’iga o le faagaioia o atina’e o le poloketi miliona tālā i le tausaga a le malo.
O loo tuua’ia le sui Faipule ma le Ofisa Sili o le ofisa tutotonu o le Fono Faavae i le 50 afe sa teu faafaigaluega i le faalapotopotoga o teugatupe o mavaega tausi a Samoa le UTOS, ona ua tala ae faatupe ai nisi o polokalame o le atina’e, ae o le faai’uga o le tausaga e tatau ona tala ai i tua.
Ua faaalia e le tofa Fesolai Tusiupu Tuigamala o ia o le ta’ita’ifono ma le komiti o le Fono Faavae ua iai sui o pitonuu ma o foaiala foi ia e fā o le itumalo na malilie e teu faafaigaluega lea seleni.
Sa o latou sa’ili muamua se finagalo o le minisita ma le Komiti Faafoe o le poloketi ma faailoa ane ai e mafai ona tala le 50 afe ona ua tuai atu vaegatupe o le poloketi e totogi ai tagata faigaluega ma faatupe ai alauni o sui o le komiti o le Fono Faavae.
E 175 afe le vaegatupe o le miliona i le tausaga e faaalu i totogi o tagata faigaluega o le ofisa autu o Fono Faavae a itumalo faapalota e 51 e faatupe ai foi ma aluni o sui o le komiti, o le seleni foi lea e faatupe ai mana’oga e ala i seleni faaalu poo expenses mo le ofisa autū o Fono Faavae.
Faaalia e le sui Faipule o Aana Alofi 1, o sui o foaiala e fā o le itumalo ua filifilia i le komiti o le Fono Faavae, o leo ia o foaiala i tonu fai o poloketi e manuia ai aiga ma tagata o le itumalo.
E lē o iai se vaega o le finagalo tusitusia o le Faipule o tali ai i le tapenaga ua faailoa e le tofa Sauvao Taueva Faafouina o se tasi o matai faiupu o le itumalo, ua ta’ua ai le tapenaga e ave le Faipule ma le Ofisa Sili i le faamasinoga i le talaina o le 50 afe tālā sa teu faafaigaluega i le UTOS.
Peita’i o loo faailoa e le Faipule ua mae’a ona saini le maliega a Aana Alofi 1 ma le malo mo le faamatuuina atu o vaegatupe o le miliona lona tolu.
O le tasi lea o vaega sa faailoa e le tofa Sauvao ua talosaga ai le itumalo i le minisita ma le Komiti Faafoe o le poloketi miliona e taofi vaegatupe o le miliona lona 3.
O le tali tusitusia a le sui faipule le tofa Fesolai Tusiupu Tuigamala o loo ia faamatalatala ai ma isi atina’e a le itumalo sa maua ai seleni mai se polokalame a le Matāgaluega o Puna’oa Faalenatura ma Siosiomaga.
