Ua amata tuli nei le faasalaga i le falepuipui i Tanumalala o le tamā o Lewis Sale Vena, ina ua ioe i le solitulafono o le talepe fale ma le lima tagovale, i se gaioiga na ia faatino i le fale o le kalapu vaafaila poo le Apia Yacht Club i Mulinuu.
Sa maua i meapu’eata o le fale o loo faamautu ai le kalapu le gaioiga a lē ua faasalaina, ma sa ia toesea ai ni fagu malosi se lua o le itguaiga o le Jim Beam ma le Bailey original.
Na ia toesea ai foi ma siliva sa i totonu o le masini tupe e tusa ma le 30 tala.
O le tau aofai o meatotino na ia gaoia e $916 tala.
Sa ioe Lewis i moliaga uma a leoleo ma o se itu lelei lea mo ia.
O lana tautinoga foi na tuuina atu i le Faamasino Sili, na ia faailoa ai o lona taimi muamua lea o le taimi mulimuli foi e tulai ai i se solitulafono i le Faamasinoga Maualuga.
E iai se moliaga faapea sa molia muamua ae na faasala tupe ma nofo vaavaaia.
Sa tatalo le itu a leoleo i se faasalaga e 18 masina i le falepuipui, peitai e lei talia e le faamasinoga lea umi o masina e amata ai se fua o le faasalaga i le toese.
E fā masina na amata ai le fua o le faasalaga ae ua aveesea nisi ma masina ma se vaiaso totoe ai le lua masina ma le lua vaiaso ua nofosala ai i le falepuipui.
