Ua ioe se tamā 50 tausaga le matua i le solitulafono o le toe fai o le isi faaipoipoga a o le’i tatalaina le faaipoipoga muamua poo le moliaga ua ta’ua o le Bigamy.
O le faasalaga maualuga o lea solitulafono e lē silia ma le 10 tausaga e nofosala ai i le falepuipui pe a faamaonia. Peitai o le tama o Ropati na ia faailoa i le faamasinoga sili a o le’i lauina sona faasalaga, o ia na te lē silafia o se solitulafono lea gaioiga na ia faia. O le tausaga e 2016 na faaipoipo muamua ai ma maua ai o la alo e to’afā, ae mai lea taimi e oo mai ia Mati o le tausaga nei na toe faia ai lana faaipoipoga ma se isi tamaitai, ma iloa ai e lona to’alua faaipoipo muamua ma molitai ai loa i leoleo.
Sa faatoese lē ua molia ma faailoa i le faamasinoga le tāua o le tulaga ua aafia ai, o le a aoaina ai lona tagata ina ia lē toe tupu. O le suesueina o ia ma molia e leoleo na toe foi ai i lo latou aiga ma nofo ai ma faatali se faai’uga o lona faamasinoga. Ua faamaonia lona moliaga ae ua faapafala se faasalaga, ae peitai ua faatonu e le faamasinoga e na te totogi le tau o le tapenaga a leoleo e selau tala. Faaalia e Ropati i fafo o le potu faamasino ua leva e lē o toe nonofo ma lona to’alua muamua, ae na taumafai e faafeiloai ma fautuaina e tatala le faaipoipoga peitai e lē manao iai lona to’alua faaipoipo muamua.
Na faailoa e lē ua molia i le faamasinoga ua toe fai le isi uo a le tina o se papalagi, ma ua manao ai foi e toe fai se isi ana tautoga fou.
