Ua feagai nei le Komisi o le Toefuataiga o Tulafono a Samoa poo le Samoa Law Reform Commission ma se galuega tāua ua valaauina ai ni finagalo o le atunuu lautele, mo le toe iloiloina o le tulafono o auupega o le tausaga e 1960.
O lea galuega a le Komisi o le Toefuataiga o Tulafono a Samoa ua afua mai i se talosaga a le matagaluega o leoleo, falepuipui ma le ola toefuataiga.
O le autu o le iloiloga o le toe fausia o se faavaa fou o le tulafono o auupega lea e faasino i laau malosi poo fana.
Ua faaalia e le komisi le mae’a pasia e le Kapeneta o se pepa mo le faia o faatalanoaga ma ua tatala ai le avanoa i le lautele o le atunuu e tuuina atu ni finagalo e ala i ni folasaga e faailoa ai poo ā ni aiaiga e fausia ai se faavaa o lea tulafono.
O Ianuari o le tausaga fou o loo faatulaga e faamuta ai lea avanoa, ae o faamatalaga uma e faatatau i lea iloiloga e maua mai i fesootaiga a le Komisi o le Toefuataiga o Tulafono a Samoa.
