Ua atoa le to’alima o atunuu ua o latou solomuli ese mai le tauvaga tele tau musika i Europa le Eurovision.
O le atunuu o Iceland lea ua faaopoopo atu ia Spain, Aialani, Slovenia ma Netherlands lea ua aga’i ese ma le tauvaga ona o le lē fiafia i le faataga ona auai ai o sui tauva mai Isaraelu.
O le faamatalaga mai le faatonu o le ofisa faasalalau autū a Iceland o Stefan Eirikson ua ia faailoa ai e matua’i leai ma se filemu poo se olioli o iai i lea tauvaga i le taimi nei ma ona o lea tulaga o le a aga’i ese ai lo latou atunuu.
Fai mai a ia o le auai ai o Isaraelu i le tauvaga ua māfua ai fevaevaea’iga i ona sui auai.
O se finagalo o le vaega o loo faafoeina le tauvaga ua faailoa ai e le faatonu, Martin Green e faaaloalogia le faai’uga ua faia e le autauva uma ua lē auai i lenei tausaga ae iai le faamoemoe e ono toe foi ane i se taimi e lē o toe mamao.
Puna o Faamatalaga: https://www.bbc.com/news/articles/cjwy9n786n0o
