Ua taoto nei le tala autu o fuafuaga tau tupe a le Malo mo le tausaga faaletupe fou, o le a soalaupule ma felafolafoa’i iai finagalo o sui mamalu o le Palemene, pe a toe usuia i le masina fou o Iuni.

E silia i le piliona tala ua faatatauina e le Malo mo ana fuafuaga i le tala autu fou o le tupe, “Ia faamausali ma faaauau ta’iala gafataulimaina mo le manuia lautele”.

O le saunoaga a le minisita o Tupe le afioga Lautimuia Afoa Uelese Vaai, i le faataatiaina o le tala autu o le tupe a le Malo, na ia faailoa ai i le maota fono fuafuaga tau tupe mo le taligamalo a le atunuu i le fono a ta’ita’i o Malo o le Taupulega lea toe fā masina o lumanai ona faagasolo lea i Samoa i le masina o Oketopa.

E 20 miliona tala o le a faaalu mo tapenaga uma o lea fono faavaomalo. 

Na faailoa foi e le Minisita o Tupe le afioga Lautimuia Afoa Uelese Vaai i lana folasaga i le Palemene, o le tausaga faaletupe fou o le a faatinoina ai le vaega mulimuli o le toe fetuunaiga o totogi mo tagata faigaluega a le Malo, auā le tali atu i aafiaga o le tau o le soifuaga, ma o le a fesoasoani i le faatupulaia o le tamaoaiga. 

E 3% le siitaga mo Ofisa Sinia maualuga poo (Principal Officers) aga’i i lalo.

E 2% o le a siitia ai totogi o i latou e i luga atu o Ofisa Sinia maualuga, ae e i lalo ifo o le Ofisa Sili o Pulega, ma le 1% o le a siitia ai totogi o Ofisa Sili o Pulega.

Sa faatino foi le iloiloga a le Komiti o Totogi a le Malo i le toe fetuunaiga o totogi mo le Pulega, Palemene ma le Faamasinoga.

I le mae’a ai o lea iloiloga, ua fautuaina ai le toe fetuunai o totogi ina ia talafeagai ma le tulaga tofi, ma o le a faamamaluina i le aso 1 Iulai 2024.

O le a faapea foi ona siitia le Penisione mo le Palemene e pei ona fautuaina e le iloiloga tutoatasi sa faia ia Iuni 2020.