Tusia – Maina Misa Fomai – Vai
O le tali lea a le Faatonu lagolago ina ua toe fesiligia i le asō i le mataupu faatatau i le tamā lea na tuuina e lona afafine i luga o le Facebook lona ata o faia ai lana masini faamanava i lalo o le tulutulu o le fale leoleo o sikulatī o le Falema’i.
O le fesili na tuuina atu i le Alii fomai e le Sui tusitala o le Talamua i le fonotaga ma tusitala o le atunuu. Po’o le a le tulaga o loo faatino ai suesuega (tests) i falema’i itumalō mo i latou ua maua ua positive ma faanofoesea i aiga. O le mafuaaga o se mataupu sa auina atu ai se tamā mai Siumu i le 76 tausaga le matua o le soifua na faanofoesea i lona aiga, i le vaiaso ua tuanai ina ua maua ua aafia i le vairasi o le Koviti…peitai ua manaomia se masini mo lana manava na agai ai ma lona afafine i le falema’i i Poutasi mo se fesoasoani.
Na oo atu ma faatonuina ina ia omai e nonofo i fafo lalo ifo o le faapaologa o le fale leoleo o sikulati o le falema’i ma fai ai le masini. Na taua e le afafine sa tele atu faaupuga a le tamaitai tausi soifua ma faapea o le tulaga lea e maua i le malosi o le feoa’i. Na pu’e e le afafine le ata ma tuuina i le Facebook ma lona faanoanoa i le tulaga na faia i lona tamā.
Na faaalia foi e le afafine o le gaioiga na ia faia ua vili atu ai tausi soifua o le falema’i I Poutasi faapea ai le avetaavale ma taufaamata’u atu ia te ia. O lana tama fo’i na faatonuina e oo atu fomai i Poutasi ma mea e sui le fusiga o lona lima na taoto i le falema’i e oo mai i le taimi nei e lei alu atu lava se tasi. Na faaalia e Tagaloa, o Falema’i uma faaitumalo ua iai lava nofoaga e siaki ai tagata i luma i le faitotoa a’o le’i ulufale.
O loo puipui fo’i ona o loo iai gasegase i totonu o le falemai nei pesia ai ia i latou ua aafia i le Koviti. “Ua iai faleie ua maea tufa atu i districts hospitals e siaki ai tagata ma mafai ai foi ona togafiti ai iina” Na ia taua foi o le mataupu lea i le tamā ma lona afafine…na maea faamalamalama iai e le aufaigaluega le tulaga lea i le Tamaita’i…..peitai… “Ia ai po’o le naunau lava o ia I sana 15 minutes of fame ua fai ai lana post, ae o mea ia ua uma ona faamalamalama iai” Sa toe faaauau lana saunoaga ma ia faapea mai ai…”
Faigatā na fai atu se tala ona o lea e su’esu’e masei lava le mamalu o lo tatou atunuu i so’o se mea..ia o le a taoto ai faapena” Sa toe tuliloa atu le mataupu lea e le tatou polokalame ma fesiligia ai pe le o se isi lea lape o le falema’i faaitumalo i Poutasi. Na tali mai Tagaloa… ” E leai se isi e leai sona sesē tulaga ua tou faapea ane ai…ua lape le aufaigaluega….Ia ai ā ua lape…ae sa ou fesiligia le aufaigaluega e leai se tulaga faapea sa faamalamalama lelei lava iai”
Na fesiligia le afafine na tuuina le ata o lona tamā i luga ma ia taua ai….o se apoapoaiga mo tausi soifua ina ia tu’u le vaai maualalo ma faailoga tagata. Na maua foi i nisi o falema’i faaitumalo e aofia ai ma Poutasi e leo iai se tulaga faapea o faia ai ni siaki I le faitotoa pe to fo’i ni faleie mo le mamalu o le atunuu, seivagana ai manoa ua toso e tapuni ai le auala ma le pepa o tusia ai….”Nao gasegase tigaina.”
