O le aoauli nei o le a tuu mai ai ni faamatalaga auiliili e faatatau i se faatoesega a le Palemia o Niu Sila Jacinda Ardern ma le atunuu atoa i tagata Pasefika uma na aafia i nisi o faiga faailoga lanu i le 50 tuasaga ua tuanai.
O nei faiga faailoga lanu o le faia lea o ni osofaiga i le vaveao i fale o loo nofoia e tagata Pasefika ma taofia, tu’uaia lea i tu’uaiga o le nonofo lē faatulafonoina i totonu o Niu Sila poo le “overstayer”
O nei faiga na omai faatasi ai tagata Pasefika uma ma tagata Maori tuufaatasia se potopotoga ma faaigoa o le “Polynesian Panthers” ma taumafai e finau mo lo latou saogalemu ma tetee atu i faiga faailoga lanu.
Taua e sui o le Polynesian Panther i le vaitau e 1970 na amata ai nei faiga a Leoleo a Niu Sila ma pau lava le mafuaaga e osofaia ai tagata pasefika ona e le’o ni tagata papa’e. O ni faiga lē talafeagai e oo mai i le taimi nei e le’o galo i loto o tagata Pasefika ma e manaomia ai se faatoesega aloaia mai le malo o Niu Sila.
E le gata i lea o le tuuaia sese o tagata pasefika ae iloa mulimuli ane o tagata papa’e lava mai isi atunuu e pei o Egelani lea o loo nonofo lē faatulafonoina i totonu o Niu Sila.
Taua mai ripoti o le Aso 26 o Iuni 2021 o le a faia ai lenei faatoesega aloaia.
