Ua faalauiloa e le Minisita o Galuega ma Femalaga’iga Olo Fiti Vaai le vaa tele a le atunuu lea na faatupe e le malo o Iapani ua faaigoaina nei ia MV Lady Naomi 60. 

O lenei vaa tele e silia ma le $66 miliona tala lona tau aofai ma o le a sui tulaga i le vaa MV Lady Naomi lea ua leva ona tautuaina le atunuu i femalaga’iga i le va o Samoa ma Amerika Samoa i le silia ma le 20 tausaga. 

O le faigamalo na te’a nei sa latou suia le igoa o le vaa mai le MV Lady Naomi i le MV Lady Samoa IV peitai na faailoa e le minisita i le tauaofiaga o le Palemene i le vaiaso na te’a nei e tatau ona tausisi igoa mo le vaa mo malaga faavaomalo ma le vaa mo malaga faaitumalo. 

O le igoa fou ua faaopoopo ai nei ma le 60 o le manatu ina ia faamanatu ai le 60 tausaga talu ona tuto’atasi Samoa mai faiga faakolone i tausgaa ua mavae. 

I ripoti a le Samoa Observer na faailoa ai e le Minisita o le masina o Setema e fuafua e taunuu ai le vaa tele lenei i le atunuu.