Sa iai le talitonuga a mae’a ona faaleleia uaea eletise malolosi i lalo o le eleele sa faaletonu, ma ta’i nisi o ia uaea malolosi i luga o pou ma toe fesoota’i ai afi eletise i Fuluasou ma Fiaga, ona toe faaleleia lea o faaletonu na mafua ai ona pē atoa le motu o Upolu i ni vaiaso ua tuana’i.
Peitai ua faaalia e le Minisita o Galuega Tetele ma Fela’ua’iga e aofia ai ma le faalapotopotoga o le malosi tau eletise, ua iai lana fuafuaga e sili ona ave sana fautuaga i le Kapeneta mo le faia o se Komisi Su’esu’e e sa’ili tonu ai le mafua’aga o le faaletonu.
I se finagalo o le minisita le tofa Olo Afoa Fiti Vaai ina ua fesoota’i atu iai i le faai’uga o le vaiaso a o toesea ma le atunuu i se fonotaga i Fiti, sa ia faailoa mai ai o fautuaga o loo tuuina atu ia te ia mai le Ofisa Sili o le malosiaga tau eletise ma inisinia, o loo faavae ai lona finagalo i le tali atu i le atunuu i mafua’aga o le pe ai o le eletise.
Peitai ua faaalia e Olo ua ia matauina e ese faamatalaga e avatu e le Ofisa Sili, ese faamatalaga e avatu e inisinia ma o ia faamatalaga o loo ia faasoa atu i le Kapeneta.
O le eseesega o ia faamatalaga ua faaalia e le minisita ua sili ai ona fai se Komisi Su’esu’e e iloa ai poo ai o loo pelogia o ia i le mafua’aga o le faaletonu ua tula’i mai.
I lea lava finagalo o le minisita ua faailoa ai o lana silasila o loo faiaga le EPC i le taliga o le siitia o le mana’omia o le eletise e pisinisi fou o loo faaaogāina le 3 phase.
O le faai’uga o le vaiaso na malaga atu ai i Niu Sila mai Fiti le alii minisita mo le faia o feutanaiga mo le aumaia o afi eletise o loo fuafua e foia ai le faaletonu o loo ua mafua ai nei ona faasoasoa le eletise i Upolu.
O lea faasoasoa o loo faaola ai nisi o vaega o le motu ae titina le eletise i nisi vaega.
