Ua tapena tulaga masani i pepa malaga ma isi vaega o loo feagai lea ma le Matagaluega o le Soifua Maloloina i le fuafuaga a le Mālō e auina atu i Niu Sila mo nisi togafitiga ma siaki faafomai le taitai o le Ituagai le susuga Tuilaepa Lupesoliai Sailele Malielegaoi.
Ua faaalia e le Minisita o le Soifua Maloloina i se ripoti a le vaega faasalalau a le Talamua o lea ua i luma o le Kapeneta lenei fuafuaga i le faamoemoe e maea tapenaga i le vaiaso fou ma e ono faatino ai loa ma le siiga gasegase i fafo mo le susuga ia Tuilaepa.
O taualumaga faaauau a le Fono Aoao Faitulafono o loo faagasolo i le vaiaso nei ua lē auai ai le taitai o le ituagai o lē sa avea ma Palemia ona o loo faatafa gasegase ma e manaomia ai nisi siaki faafomai e pei ona fuafua ai e auina atu i Aotearoa i Niu Sila.
