O Peter Dutton lea ua lipotia i le 7News i le asō o le a ono avea ma taitai o le Liberal ae o Sussan Ley e ono avea ma sui taitai e pei ona saunoa ai lë sa avea ma minisita o mataupu faalotoifale, o Karen Andrews.
O le faipule lea mai le Gold Coast na ia faailoa i le Sunrise le tulaga lea aemaise se faamatalaga e faapea na afea e nisi o sui o le Liberal le teutupe o Josh Frydenburg ina ia lu’ia le tulaga taitai o le vaega faaupufai a o loma le palota.
Na faailoa e Andrews o loo latou iloa o loo iai nisi o mafuaaga ua lē lagolagoina ai e le toatele o tagata le toe faatu mai o le faigamalo a le Soofaatasi ma o le Palemia lava sa avea ma popolega mo nisi o nofoa.
Fai mai Andrews o lona manatu e telē se galuega e manaomia ona faia e le Liberal pe afai e manao e toe manumaloina le faigamalo mai le Leipa i le isi tolu tausaga.
Fai mai a ia e tatau ona matuai silasila ma le toto’a le latou vaega faaupufai poo ā tonu mataupu ma tulaga o loo latou lagolagoina ma ia toe faatulaga lelei ia polisi.
