Ua saunoa le Peresetene o le Atu Filipaina, Ferdinand Marcos o loo ia galue nei i le faamautūina o le suāuu mo le atunuu i le mae’a ona ia faailoa le iai o le atunuu i lalo o poloa’iga o faalavelave tutupu faafuase’i e faatatau i malosi’aga, energy ona o le taua i Iran.
Na saunoa Marcos i le televise a lona atunuu e faapea, o le a aumaia e le malo le tasi le miliona o paelo suāuu e faaopoopo i le suāuu o loo totoe nei i le atunuu ina ia faaau atu ai le sapalai mo le isi 45 aso ma o le a sologa lelei ai lava le suāuu.
O le Atu Filipaina e pei ona lipotia e le CNN, o le 98 pasene o lana suāuu e sau sa’o mai le Gulf poo le Faga i Peresia ma o latou le atunuu muamua ua folafola le energy emergency talu ona amataina le taua i Sasa’e Tutotonu.
Ua faailoa foi e le Amepasa o le Atu Filipaina i Amerika, o loo galulue faatasi foi ma Amerika ina ia faamautū ni avanoa e mafai ai ona aveina sa’o ane suāuu a le Atu Filipaina mai atunuu o loo faia iai sā poo sanctions a le malo tele.
Puna o Faamatalaga: https://www.bbc.com/news/articles/c3ex8ez3717o
