O le auai atu o le taitai o le malo le afioga i le Tamaitai Palemia i le fono lona 52 a taitai o atunuu e 18 o le Pasefika sa talimalo ai le Malo o le Atu Kuki i le vaiaso na tea nei, na faia ai se tali faaaloalo mo le tamaitai Palemia e nisi o tauaiga o lona tuaa tamā i le suafa Mata’afa o loo faamautu i le Atu Kuki.
Na faia ai ma se foai o se fanua e tusa ma le ‘afa eka lona telē e le auaiga o Ngati Maoate i le maota o lea aiga maualuga o lea atunuu i le nofoaga o le Pa Ariki Palace.
I lipoti a le televise a le Atu Kuki sa faasalalauina lea tali faaaloalo mo le Palemia o Samoa, sa faailoa ai e le taitai o le aiga o Ngati Maoate o le autu o le foai ia fausia ai se nofoaga e avea ma maota e tapuvae tasi iai soo se faatasiga a tagata Samoa ma ē iai piitaga i Samoa i totonu o le Atu Kuki.
E lei faailoaina pe fia se aofai o tagatanuu Samoa o faamautu ai i lea atunuu ae ua faailoa e le taitai o le aiga i le faatasiga, ua ia molimauina pea le faatupulaia o tagata mai Samoa e agai atu ma faamautu i le Atu Kuki o le mafuaaga lea o le faia o le foai o le fanua e ‘afa eka lona telē.
O le taitai o le Malo le Afioga Fiame Naomi Mataafa na ia talia ma le faafetai le foai aemaise o isi meaalofa sa tauaaoina mo ia.
Sa ia momoli lea faafetai i le gagana Peretania.
Le afioga i le Tamaitai Palemia, Fiame Naomi Mataafa a o iai i le Atu Kuki.
