Ua foai e le malo o Iapani le silia i le 500 afe tala Samoa mo le Pulega o le Suavai e faatau ai taavale Pikiapu Landcruiser e 5 auā le faatinoga o ana galuega.

O le naunautaiga o le Pulega o le Suavai ina ia lelei ma vave le auaunaga i ana paaga uma aemaise lava o le atunuu atoa, o lona uiga e manaomia le lelei atoatoa o taavale o loo faaaogāina e le Pulega.

O le ala lea na tuuina atu ai se talosaga i le masina o Aokuso o le tausaga na mavae nei mo se seleni, ma o le vaiaso nei na faatino ai le sainiga lima i le va o le pulega ma le Amepasa e faamatuu mai ai lea vaegatupe.

Na faaalia e le Pule Sili o le Suavai o ia taavale o le a faaaogāina mo Upolu ma Savaii.

Sa fesiligia pe aisea e manaomia ai ituaiga taavale o le Landcruisers ae na tali le Pule Sili, o taavale ia e aogā mo galuega a le pulega, ona e fai lava si mamao ma gaoā o auala e uia e le aufaigaluega pe a faatino a latou galuega.

E oo mai i le taimi nei e 89 pasene tagata o le atunuu o loo faaaogāina le auaunaga a le Pulega ae o le isi vaega o loo i lalo o polokalame a nuu ma afioaga lea e pulea lava e latou o latou vai.

Saunoa le Amepasa o le malo o Iapani, e tele isi atinae a le pulega ua fesoasoani iai le malo o Iapani e pei o le faalauteleina o le tomai ma le agavaa i le faatinoga o galuega.

O le taimi muamua lea ua talosaga ai le pulega i ni taavale.

O le talosaga a le Amepasa ia faaaogā tatau mo galuega a le pulega.