E fa pusaoloa tetele o uta o nofoa, laulau, kesi, o fata tusi ma isi meaafale e aoga mo fanau i totonu o potua’oga ua faamanuiaina ai tama ma teine ma faiaoga o le A’oga tulagalua a le afioaga o Satapuala, i se foai mai aoga a le Ekalesia Agelikana i Sini Ausetalia.
O le Aso Lua o le vaiaso nei na momoli atu ai pusaoloa ma lea uta tele i le afioaga mo le faaaogaina e fanau o lea aoga tulaga lua, ma ua fetaui lelei ma le toe a’e o aoga o lenei tausaga fou.
Ua faailoa mai e le sui faipule o le itumalo palota o A’ana Alofi Nu. 4 o se matai foi o le afioaga o Satapuala o loo avea nei ma Minisita o le kapeneta, le afioga Toeolesulusulu Cedric Schuster, o se agaga fiafia ia te ia le taunuu o lea agalelei o le a maua ai e fanau a le aoga tulagalua a lona nuu, ma nisi aoga tulagalua a lona itumalo ni nofoa ma laulau faapea kesi latou te faaaoga auā e tāua le lelei o vaega ia mo le aoaoina lelei o fanau.
O le foai na tauala mai i se manaoga na talosaga iai le suifaipule o Aana Alofi Numera 4 ma aumai ai i le fesoasoani a le kamupani vaa o le SWIRE Shipping i Ausetalia.
O loo iai nisi o foai faapenei o le a tuuina atu i isi aoga tulagalua a lea itumalo i le taimi e taunuu ai.
Ua fuafua o se taimi e malaga mai ai sui o le faalapotopotoga o aoga a Ekalesia Agelikana i Sini ma sui o le kamupani vaa na aumaia pusaoloa e leai se totogi mo le tauaao aloaia o le foai, ae mo le taimi nei ua faaaoga e fanau ma faiaoga a le aoga tulagalua a Satapuala le foai.
