Ua siisii pea le agalelei o le kamupani lafo tupe faamomoli o le Pacific Ezy Money Transfer e lagolago ai i le faatupeina o taamilosaga lakapi ta’ito’afitu a le kalapu taalo o le Malisi Sagato Iosefo i Samoa, e pei ona foa’i e le pulega ma le kamupani le sefuluafe tala mo le taamilosaga o lenei tausaga, lea na tolopo mai ia Mati i le masina nei o Iuni.
Faaalia e le Peresetene o le kalapu taalo a le Malisi e lē o tuua le agalelei pea o le Pacific Ezy talu lava ona faatuina lana auaunaga i le agalelei i tapenaga o taamilosaga ta’ito’afitu ma o lea o loo faaauau pea.
“Ae o le tulaga i le meaalofa lea a le Pacific Ezy, ia masalo mai lava i le taimi na faapena foi ona savalia e le kalapu le kamupani foi i lena vaitau, ou te lagona e le’i motusia lava le auaunaga a le Pacific Ezy. Ia o lea foi la ua siitia le tulaga i le matou tilotilo i le tulaga o le kamupani, o lea ua lautele ua Pasefika, ou te talitonu foi o le a aga’iga’i foi i luma se latou fesoasoani. E pei ona iai le tausaga lenei. Faaalia foi le agaga fiafia ona o lea ua 10 afe. Auā pei sa amata mai lava pei sa 5 afe, faasolosolo mai ai. Ae lē o toe na ma le lāina, e lē o toe faigofie lenei vaitau. Ia ae o le lagona, o le talitonuina lava e paaga foi aemaise le lagolago a le atunuu i sponsors ia lenei foi taumafaiga poo le platform foi a le kalapu, ona e lē o toe po se lilo le taumafaiga lava lenei, sa mua i malae i le tulaga lava lea o le taumafaiga o le tatou ta’ito’afitu. E pei foi la ona fetaui tonu le matou faamoemoe ma le mālōlō mai o le tatou Manu Samoa. Sa mafaufau foi la e faaaogā lea foi avanoa, e toe saili ai nisi foi alo e mafai ona toe silasila i ai le Pulega auā le Commonwealth ia ma le faagasologa o le faaumaina o le series. Ae o le tulaga e pei ona iai le asō ma le foa’i foi, e lagona lava le lotomaulalo o le kalapu ma le faagaeetia foi.”
Le Pelesetene o le kalapu taalo a le Malisi i Samoa susuga Pouniu Peter Schmidt. Ua faailoa e le pulega o le Pacific Ezy sa tuuina atu foi sana foa’i tupe mo le pulega o le taaloga Lakapi Liki i Samoa auā tapenaga a le ‘au o le Toa Samoa mo le Ipu o le lalolagi i le tausaga nei. Ae i le taamilosaga lakapi ta’ito’afitu lona 34 a le Malisi Sagato Iosefo e faia i le faai’uga o le vaiaso nei, e 16 ‘au a alii ae lima ‘au a tamaitai o le a tausinio ai.
O le tasi o lagolago a le Pcific Ezy i le taamilosaga ta’ito’afitu a le Malisi ua ia lagolago ai le ‘au alii faapea le ‘au a tamaitai o le Tepatasi mai le motu o Upolu ua faaopoopo i le lagolago masani a lea lava kamupani i le aulakapi ta’ito’afitu a le afioaga o Safotu i Savaii.
