O le 32 pasene o totogi faaopoopo i luga o oloa e auina atu a Fiti i le malo tele o Amerika o le a tele se aafiaga lē lelei i nisi o le aufaatau i Amerika aemaise le aufaifaato’aga e pei ona saunoa iai se tasi o faifaato’aga e sapalaia le tele o le kava poo le ‘ava i Amerika.
O le faatonu o le kamupani a le Wakanavu Kava, Saimon Lomaloma na ia faailoa i le RNZ Pacific, o tariffs a Trump ua matuā mafua ai le popole o tagata aemaise le au faifaato’aga aemaise ona o Amerika le maketi aupito tele e aga’i iai le kava mai Fiti, sa masani lava e lē popole i ni tariffs i le taimi muamua auā e le’i iai se totogi ae a iai foi e itiiti lava peitai ua matuā suia mea uma i totogi faaopoopo ua faailoa ane.
E manatu Lomaloma e lē taumate o le a amata vaavaai tagata faatau kava i Amerika i isi kamupani faatau ‘ava mai Vanuatu, Solomona ma Tonga, o le a taugofie atu nai lo le kava Fiti.
Na finau mai le aufaifaato’aga e lē talafeagai le tuuina o tariffs i isi atumotu o le Pasefika e na o le ta’i 10 pasene a o Fiti e 32 pasene.
Puna o Faamatalaga: https://www.rnz.co.nz/international/pacific-news/557363/tough-times-for-kava-farmers-as-32-percent-us-tariff-hits
