O se tina e toalua si ana fanau ma o loo gasegase tigaina ua ia finau i le malo ina ia toe silasila i le tulafono e ta’u ai e solitulafono le tagofia o isi ituaiga togafitiga e faaigoa i le faaperetania, life extending medication.

Fai mai le Patient Voice Aotearoa afai ae le suia le Therapeutic Products Bill, o le a le gata ina ma’umau ai soifua o tagata ae o le a taofia ai foi le aufaasalalau ma nisi tagata mai le faalauiloa faalauaiteleina o togafitiga e le o faatupeina.

O le faamatalaga i le tina lea e faapea sa maua i suesuega a fomai ua aafia i le stage 4 o le kanesa o le māmā ma sa faailoa iai masalo pe ā ma le toe 9 ni masina e soifua ai, peitai fai mai lea tina talu ona inuina le fualaau o le Tagrix ua ia faailoa ua leai se kanesa ma ua faaitiitia foi le tumour sa i lona māmā agavale ma ua matuai suia ai lona olaga. 

O le Tagrix lea fai mai nisi lipoti e i le ituaiga lava o le Astrazeneca ma e le faatupeina pe lesitalaina e Niu Sila, o lona uiga mo le tina e pei ona ta’ua, o Bangladesh na maua mai ai ae fai mai e afe tala Niu Sila i le masina le tau ma o lalo la o le pili o loo taufaaofi nei, e solitulafono ai le aumaia e gasegase pei o le tina lea, o lea ituaiga fualaau e faaui mai i le meli. 

E manatu le Patient Voice Aotearoa e toatele tagata Niu Sila e pei o si tina lea o le a aafia ai i le pili lea, lea fai mai ua mae’a pasiaina lona faitauga muamua.