I le tausaga e 2015 na amata galue ai le tinā ia Seveaogā Saina Tomi i le ofisa o le iuni a tagata faigaluega a Samoa le Samoa First Union, ae ua oo mai i le masina o Mati o lenei tausaga 2026 ua tusi aao iai sui o le fono a tagata faigaluega a Samoa poo le Samoa Workers Congress e avea o ia ma o latou Pelesetene, i le fono faaletausaga a le faalapotopotoga sa usuia i le Aso Toona’i na te’a nei.
O lea faalapotopotoga tuufaatasi a tagata faigaluega i Samoa na faalauiloa ma amata faagaioi i le tausaga e 2014 i se taumafaiga e galulue faatasi ai tagata faigaluega e sa’ili auala lelei ma silisili e fesoasoani ai e faaleleia faamanuiaga tau totogi ma isi penefiti i totonu o galuega o loo tautua ai.
O loo silasila mamao le Pelesetene ua filifilia e faamalosia leo o tagata faigaluega i faai’uga fai i soo se matāupu e aafia ai tagata faigaluega i Samoa.
Ua naunau foi ia tele ni faalauiloa e malamalama ai tagata faigaluega i o latou aiā tatau.
O le ulua’i Pelesetene o le faalapotopotoga o le faletua le afioga Gatoloaifaana Tili Afamasaga, ae o se tasi o tinā mai le tomai faatausi soifua na avea ma Sui Pelesetene se’ia oo ina filifilia le isi Pelesetene fou le faletua ia Seveaogā Saina Tomi Setu Fetalaiga.
O isi sui o le laulau a le Samoa Workers Congress na filifilia i le latou fono faaletausaga o Sui Pelesetene e to’alua o Latama Peteru mai le asosi a tausi soifua ma Vaiaso Finau o le Sosaiete a Faia’oga Samoa.
O le Failautusi o Maposua Tanya Toailoa mai le Samoa First Union, Sui Failautusi o Lealofi Fraser mai le faalapotopotoga o faaputugatupe o le lumana’i manuia o tagata le NPF ma le Teutupe o Vainalepa Solomona mai le faletupe o atina’e a Samoa.
E tofia Seveaogā Saina e avea ma Pelesetene o le faalapotopotoga tuufaatasi a tagata faigaluega a Samoa o loo ia tauave le tulaga o le Sui Ta’ita’ifono o le Pacific Island Council of Trade Union.
Na filifilia iai o ia i lea tulaga ia Fepuari o le tausaga ua mavae ona o Samoa o se tasi o atunuu o loo finauina le faaleleia o faamanuiaga tau totogi ma isi penefiti o tagata faigaluega o le Pasefika o loo galulue i le polokalame o le Pacific Labour Mobility poo galuega faavaitaimi i Ausetalia faapea Niu Sila.
