Ua iai nei le Ofisa Sili fou o le kamupani vaa a Samoa le Samoa Shipping Services o loo iai le vaaia o galuega mo alii ma tamaitai seila i luga o vaa oloa tetele i atunuu i fafo.
Ua mae’a ona faasalalau le avanoa ina ua faamavae le afioga Lautimu’ia Afoa Uelese Vaai, ua avea ma sui usufono filifilia o le itumalo o le Vaimauga 3.
O le mae’a ona faasalalau ma faia faatalanoaga ua filifilia ai le susuga Tafesilifa’i Ipiniu Filipo e avea ma Pule poo le General Manager mo lea auaunaga tuma’oti a le Malo.
O ia o se tasi o tagata faigaluega sinia i le kamupani vaa a Samoa lea sa avea ai ma sui Pule talu mai le tausaga e 2019.
Sa galue foi o ia i nisi o tautua a le Malo a o lei galue i le kamupani vaa, e pei o le tausaga e 2013 i le 2018 sa galue i le Ofisa o le Pule Faatonu poo le Regulator.
O loo ia umia ni faailoga mai le Iunivesite a le Pasefika.
O se tasi o filifiliga ua faailoa lautele mai i le tuanai o ni masina ma ni vaiaso o faagasolo le filifilia o se faauluuluga o le faalapotopotoga o le faaputugatupe o le lumanai manuia o tagata le NPF, o lea ua filifilia se tamaitai e avea ma Ofisa Sili fou o lea faalapotopotoga a le Malo, ma ua toalua ia te ia auga faapae ma tausala o le atunuu ua tofia e faauluulu iai lea auaunaga tāua a le Malo.
O le afioga Lemalu Selesitina Puleaga Meni Tusani Iosefatu Reti, o le ofisa sili filifilia lea o le faalapotpotoga o le NPF poo le Samoa National Provident Fund.
E tofia o ia o loo ia tauaveina le tulaga o le taitaifono o le Komiti Faatonu o le Faalapotopotoga o le Esetete Tausi o Samoa.
Sa galue foi i nisi o faalapotopotoga faavaomalo e pei o le faalapotopotoga o le siosiomaga a le Pasefika le SPREP, ae sa tautua foi i le faalapotopotoga o le NPF mo le tele o tausaga, a o lei suia nisi o galuega sa tautua ai.
E 3 tausaga o lana konekarate, ma ua sui tulaga i le tofa Pauli Prince Suhren, sa avea ma Ofisa Sili.
