Ua filifilia nei se tasi o faamasino o le Faamasinoga o Fanua ma Suafa, le afioga Laulu Enele Taefu e na te tauave le tofiga pelesetene lagolago o lea faamasinoga.
O le Aso Gafua o lenei vaiaso na faatauto ai o ia i luma o le afioga i le Pelesetene o lea faamasinoga a le atunuu, le afioga Lesatele Rapi Vaai, ma le Sui Pelesetene le afioga Afamasaga Michael Soonalole.
Sa molimauina foi le faatautoga o le pelesetene lagolago fou e le Ofisa Sili o le Matagaluega o Faamasinoga ma le Faafoeina o Mataupu Tau Faamasinoga, faapea nisi o ofisa sinia ma faamasino o le Faamasinoga o Fanua ma Suafa faapea nisi o aiga o le pelesetene lagolago filifilia.
O le afioga Laulu Enele Taefu na filifilia o se tasi o faamasino o le Faamasinoga o Fanua ma Suafa i le masina o Tesema o le tausaga e 2019, lea na faatauto ai ma nisi o faamasino e to’alima o lea faamasinoga i lena lava tausaga.
O lona uiga ua savalia nei le lima tausaga talu ona ia tauave le tofiga faamasino o le Faamasinoga o Fanua ma Suafa.
Na avea o ia ma faamasino i le tuanai o tausaga e tele sa galue ai i le Malo i le vaega o femalagaa’iga i le matagaluega a le Palemia ma le Kapeneta.
