Ua filifilia nei se tasi o tamaitai o le atunuu le tofa Lagaaia poo le afioga Lealiifano Easter Manila Silipa, e avea ma Faatonu poo le Country Director o le Kolisi o Matata Eseese a Ausetalia o loo faatuina i Samoa i le nofoaga o loo iai le Iunivesite Aoao o Samoa i le Papaigalagala.
Sa avea o ia ma Ofisa Sili o le Pulega o Faailoga ma Tusipasi a Samoa o se tasi o auaunaga a le Malo, a o le’i filifilia i le tofiga ua ia tauaveina i le taimi nei. E 16 tausaga o galue ai i le ofisa o le Pulega o Faailoga ma Tusipasi a Samoa.
I lona tofiga fou o le a faauluulu ia te ia galuega uma i le Kolisi o Matata Eseese faapitoa e lē gata i Samoa ae faapea ma le lālā o lea kolisi o loo i Tonga. Ua sui tulaga Lagaaia Lealiifano Easter Manila Silipa i se tasi o alo tamaitai o Samoa sa ia tauaveina foi lea tofiga le tamaitai o Cheri Robinson Moors.
