O loo faagasolo tapenaga a Samoa mo le filiina o sana autaaalo lelei ma malolosi mo le sailiga o ni pine auro, siliva ma apamemea i taaloga a le Pasefika i le agai atu i le faaiuga o lenei tausaga.

O se tasi o taaloga o le a tausinio ai Samoa o le lakapi pa’i poo le touch rugby lea ua faailoa mai le filifilia o ana faiaoga mo le filiina o se ‘au mo taaloga a le Pasefika, ma se aulakapi pa’i mo le Ipu o le lalolagi o le a faia i Nottingham i Egelani i le tausaga fou 2024.

E toalua tamafanau a Samoa ua filifilia e avea ma faiaogaulu mo ‘au a alii ma tamaitai i le vaega o le open men and women’s team.

O i laua ia o Kalolo Lepou ma Mailata Michael Wulf.

O faiaoga lagolago mo ‘au lava ia o le alii Ausetalia o Philly Hoops ma Arepa Ohia mai Niu Sila.

O faiaoga mo ‘au fefiloi poo mix teams o Arepa Ohia ma Philly Hoops.

Faaalia e le asosi lakapi pa’i a Samoa e iai le faamoemoe ma le naunautaiga o le a filifilia se ‘au lelei a alii ma tamaitai faapea ni ‘au fefiloi e tausinio i taaloga a le Pasefika, ma maua ai le avanoa e fili se ‘au e tapena mo le Ipu o le lalolagi i le tausaga fou.