E talitonu o le toe faaopoopo ane o tamaitai taaalo o Jane Watson, Karin Burger ma Gina Crampton i le ‘au a le Silver Ferns mo a latou tapenaga agai atu i le masina fou i le Quad Series i Aferika i Saute o le a fesoasoani tele lea i le malosi o le ‘au. 

O le tamaitai o Watson sa malolo livi maternity ma Burger sa feagai ma manuaga na le mafai ai ona auai i taaloga o le Commonwealth i Birmingham ma le tamaitai o Crampton sa iai i lana konekarate i le UK lea ua toe foi mai. 

O le wing attack a le ‘au o Peta Toeava lea foi ua faamautu mo lea faamoemoe a o tumau foi tamaitai togi o le ‘au e aofia ai le kapeteni, Ameliaranne Ekenasio.

Faailoa le fiafia o le faiaoga Dame Noeline Taurua i le toe foi atu o le toatolu lea ma ia faailoa ai o le Quad Series o se taamilosaga tāua lea i le sauniuni atu a le ‘au i le Ipu o le lalolagi i le netipolo i le tausaga fou 2023.

O le ‘au la ua faamautu mai mo lea faamoemoe e aofia ai Karin Burger, Gina Crampton, Ameliaranne Ekenasio o le kapeteni, Sulu Fitzpatrick, Kate Heffernan, Kelly Jury, Phoenix Karaka, Clare Kersten, Grace Nweke, Te Paea Selby-Rickit, Whitney Souness, Peta Toeava, Jane Watson ma Maia Wilson.

O le taamilosaga e mai le aso 22-26 o Ianuari i le va o le Silver Ferns, Ausetalia, Egelani ma Aferika i Saute.