Search
Photo: 1News

Fiafia si aiga Tonga, ua lē oo ona toe aveese si o latou aunt mai Niu Sila

O si tina ia Loasi Latu, o se tagatanuu Tonga, pe ā ma le 20 tausaga talu ona nofo i Niu Sila i lona visa a’oga na sau ai, sa iai le faaiuga a le matagaluega o femalagaa’iga a Niu Sila, ua tatau ona toe alu ese mai Niu Sila, peitai e tele ni mafuaaga ogaoga sa finau ai lava si nei tina ma lona aiga i Niu Sila sa faatalosaga ai pea ma tu’itu’i i le minisita ma le matagaluega mo se avanoa e nofo ai pea o ia i Niu Sila.

O le tala fiafia la lea ua maua mai ananafi mo si nei tina ma lona aiga ua faataga mai iai e le minisita lagolago a le matagaluega o femalagaa’iga, Chris Penk, se visa lē tumau mo le umi e lima tausaga, o se umi ua talafeagai e mafai ai ona toe galulue lona aiga mo le tapenaina o se talosaga mo se visa nofomau.

Loasi Latu & tuagane ia Viliami Takapautolo. Photo: 1News

O loo lipotia i le 1News le faaleoina o le agaga faafetai o lenei tina aemaise si ona aiga atoa, “Ou te fia faafetai i le Atua. Ou te fia faafetai foi i si o’u aiga na i latou uma lava na fesoasoani mai ia te au.”

O mafuaaga sa mamafa i le mafaufau o si nei tina pe afai o le a toe alu ese atu ma Niu Sila, ona o ia lea sa gafa atoa ma le tausiga o si ona tuagane o Viliami Takapautolo, o loo aafia i se gasegase tuga.

O le teena ai e le minisita lagolago i le taimi muamua o le visa o Loasi ma lona toalua, na tulai mai ai le tele o ni faitioga mai tagata lautele, ma e toatele na latou tuuina lenei mataupu i luga o le social media e valaau ai i soo se tasi ina ia lagolago mai i le talosaga a si aiga mo le faigamalo aemaise le matagaluega tonu e fitoitonu iai lenei mataupu, ina ia toe silasila ane i mafuaaga tāua nei o loo finau ai si tina e fia nofo pea i Niu Sila, aemaise lava mo le tausiga o si ona tuagane ma’i.

Faaalia lagona fiafia o le aiga, ua uma atu taimi sa nonofo ai na le fefefe pe a faalālā mai le toe faafoi faamalosi o si o latou aunt i Tonga, ae o lea la ua saoloto nei ma toe faaauau ai mafutaga a le aiga i Niu Sila, aemaise le tausiga o si o latou uncle o loo gasegase.

O le tulai mai o lenei mataupu ua toe faamausaliina ai le manatu, afai e tulai mai se mataupu e ono aafia ai se tasi i ni faaiuga e manatu i ai e lē o amiotonu le faiga, e mautinoa le lagolago mai a le toatele, e tusa lava pe lē masani ai, ae o le agaga lea o tagata soifua uma, e fia lagolago i le faiga o le amiotonu.

Puna o Faamatalaga: https://www.1news.co.nz/2024/07/05/overstaying-tongan-aunt-and-caregiver-granted-five-year-clemency/?fbclid=IwZXh0bgNhZW0CMTAAAR0qcrjcb8VX3S7ZedZqXheRPxjHQJI3agAsXWhha_r5y_1LJZBMJsebI2c_aem_PhLSjtqwRMNubgHpmGnnbw

Tala sili ona faitaulia

SAMOA UPDATE

PODCASTS

Listen on

TALA FOU MAI SAMOA

FAATALATALANOAGA

POLOKALAME A LEOLEO

Keep uptodate with Radio Samoa activity & promotion

* indicates required