I se lipoti lata mai i le tulaga o iai le setete o Niu Sa Uelese aemaise lava Sini lea na matua’i aafia i lologa talu ai nei, o loo faaauau pea le faamamāina o nisi o vaipanoa aemaise maota ma laoa o aiga na aafia i lologa. 

O se itu ua maitauina e talafou o le vave o le tali mai a le faigamalo ua iai nei i mana’oga o tagata mo ni fesoasoani tau tupe auā mafatiaga na feagai ai ma aafiaga o lologa.  

E lē gata i le vave o le ofoina mai o fesoasoani tau tupe mo tagata ta’ito’atasi ma aiga ae faapea foi mo le aufaipisinisi. O loo iai avanoa ua faailoa ane e mafai ona talosaga ai i ni vaega tupe e oo atu i le 50 afe e toe faaleleia ai mea faaleagaina ma fesoasoani ai i pisinisi.  

O le isi itu ua faailoa ai le fiafia o le to’atele ona o le vave foi o le agai ane ma le tali ane a le ofisa e feagai ma auaunaga fesoasoani i taimi o faalavelave faapea faalenatura, faapea foi leoleo ma  i latou e galulue fua e aunoa ma se totogiina o auaunaga.  

O se tasi lea o toomaga mo nai aiga na aafia ina ua maua ane fesoasoani tau tupe ia a o toe agai ai  foi e tau faamamā ma toe amata lelei aiga i le mae’a o aafiaga mai le lologa e puupuu se taimi na aafia ai peitai e fai si ogaoga o aafiaga.