O loo fiafia pea Ausetalia ma viivii ana autaalo i Taaloga a Malo o le Taupulega poo le Commonwealth Games ua lata ina faai’uina ona fai mai se faamatalaga o le autaalo aupito i tulaga ese lea ua ave atu a Ausetalia i nei faamoemoe tetele o le lalolagi.
O le taimi o talafou ananafi na faamauina ai e 174 pine ua maua e le ‘au a Ausetalia mai taaloga eseese na tausinio ai ma sa manatu le to’atele e mae’a loa taaloga aau i le amataga mai o le faamoemoe, ona toe faasee ese lea o Ausetalia mai le tulaga muamua i le lisi o atunuu aupito maualuga pine e maua, peitai e oo mai lava i le aso ananafi o loo pine silia lava Ausetalia.
O taaloga eseese ua faamanuiaina ai le autaalo a Ausetalia i pine aemaise lava i le auro ma o le faai’uga lava ia o le vaiaso ma le amataga mai o lenei vaiaso e na o le Commonwealth lava o loo talanoa ai le to’atele o tagata Ausetalia ma tapua’i pea le alofaiva o ana tamafanau.
O le asō e tapunia aloa’ia ai ia taaloga.
