E toalua tagata mai Peretania e talitonuina o se ulugalii faatasi ai ma se tamaitai mai Sini lea e atoa iai le toafa o tagata ua maliliu i le faalavelave na feto’ai ai ni helicopters se lua e lata i le nofoaga o le Sea World i le Gold Coast.
O isi pasese e toalua e aofia ai ma se tamaititi e 10 tausaga le matua o loo iai pea i se tulaga ogaoga o manuaga i le falemai a o tau fai faailoa ai alofaaga ma talosaga a tagata e masani ai faapea aiga i le tulai mai o lenei faalavelave.
O le pailate o le helicopter ua maliu ai ae o le isi pasese o loo manua e aofia ai ma se tamaititi 9 tausaga ae ua faasolo manuia.
O tagata Peretania o loo feta’ua’ina e faapea o le ulugalii e 65 ma le 57 tausaga le matutua ae o le isi e toafa iai o se pasese foi o se tamaitai mai Glenmore Park i le itu i Sisifo o Sini.
O le pailate ua maliu o Ashley Jenkinson sa faigaluega i le Sea World talu mai le 2019.
Fai mai faamatalaga a leoleo e faapea e toaono tagata sa i luga o le isi helicopter lea sa tulaueleele lelei e lei iai ni manuaga tuga ma e aofia ai pasese mai Niu Sila.
O le isi helicopter na malaga atu ai le pailate ua maliu ma isi ua manunua ma o loo faatino nei le suesuega i lenei faalavelave.