O le faaupuga i le faaperetania Queensland expects you to do your duty, o loo lomia i totonu o kola o jerseys o le ‘au a le Maroons, ua lipotia ua silia ma le 40 tausaga talu ona iai ma o le faaupuga lea o le a taulai foi iai le ‘au i le faatinoina o o latou tiute i le po nanei i le fetauiga muamua ma le Blues a Niu Sa Uelese i le uluai taaloga o le State of Origin mo lenei tausaga. 

Fai mai sui o le Maroons i se lipoti, o lea faaupuga na faia e se tasi iloga o le Maroons, Dick Tosser Turner e faaigoa foi o le Maroons Godfather ma e avea pea ma faamalosiau mo soo se tasi e laeiina le jersey a le ‘au.

Ua lomia foi la lea faaupuga i se banner o le a taulai iai le vaai a alii taaalo pe aga atu mo le malae i le afiafi ananei.

Mo le Blues e leai se maa e le o fulifulia e le faiaoga o le ‘au Brad Fittler ao taumafai ai e saili avanoa e faafetaui ai le malosi o le Maroons a o lumanai ai le taaloga.

O Adelaide lea e talimalo i le uluai fetauiga lea i le po ananei.