O le maketi o i’a i Aukilani ua autausaga peitai ua iai se lipoti i le vaiaso nei ua ta’ua ai e ono iai i se tulaga lē mautonu lona lumanai ina ua faailoa ua amata fuafuaga a le kamupani o loo umia le maketi, le Sanford Seafood company, ina ia faatauina.
Ua silia ma le 100 tausaga o faatau ai i’a i lea nofoaga talu ona faatoa tatala i le 1904 e le alii faipisinisi o Albert Sanford.
O le Pulega a Aukilani latou te umia le fale lea i Jellicoe St i Wynyard ae e 4 lisi tai 20 tausaga o loo umia e le Sandford ma le avanoa e toe faaopoopo ai le umi.
Fai mai tusitusiga i le Stuff e talitonuina ua iai lē e ono faatāua lea pisinisi ma faaaogā le nofoaga e faia ai se isi pisinisi fou peitai e manaomia ona faatino nisi tulaga e ono manaomia ai ona faatalanoaina e le Council ni finagalo o tagata lautele.
Ua ta’ua foi i le lipoti sa fuafua e talanoaina e le Pulega a Aukilani le mataupu lea i le fonotaga o le masina nei peitai ua faailoa e le pulenuu o Wayne Brown e toe faataatia atu le mataupu i le tausaga fou.
