Ua mafai nei ona nonofo i nofoa ma kesi nisi o fanau o aoaoina i totonu o le Kolisi o Mata’aevave i le itumalo o Faasaleleaga Numera 2, ona o le agalelei o le Malo o Saina, na o latou talia le talosaga a le Pule ma faiaoga o le kolisi na faaauala atu i le sui faipule o Faasaleleaga Numera 2, le afioga Magele Sekati Fiaui.
O le tau o nofoa e 150 ma kesi e 150, e $42,000 tala. O se fesoasoani tāua mo fanau sa nonofo i lalo i le tele o taimi a o feagai ma aoaoga.
Na faaalia e le sui faipule o le Minisita lagolago foi o le Matagaluega o Tupe, o le molimau atu lea a faiaoga ma o le mafuaaga foi lea na sulu atu ai mo se fesoasoani i se auala e maua ai se laveai mo fanau sa nonofo i lalo.
O le nonofo i lalo o fanau e le fou auā o le vaaiga lea sa iai i le tele o aoga i lo tatou atunuu i tausaga ua tuanai.
Peitai o aso ia sa ‘oa faiva alofilima o tina ma tamaitai o le atunuu i le lalagaina o fala papa sa faaaoga e fanau e saofafai ai i totonu o potu aoga.
O aso nei e pei ona faaalia e le afioga Magele Sekati Fiaui, o le tala atu a faiaoga o le kolisi o Mata’aevave, ua toaitiiti lava fanau e maua papa fala e le pei o aso ua tuanai, o le mea masani lea e a’e atu ma le tama ma le teine auā e faaaoga e nonofo ai, a o lei tele ina faaaoga ni nofoa ma kesi.
Le afioga Magele Sekati Fiaui, o le sui faipule o Faasaleleaga Numera 2. O fanau i le itumalo o Faasaleleaga Numera 1 ma Faasaleleaga Numera 3 o loo aooga i le kolisi o Mata’aevave.
