O le oo mai ai o le vaa o le puipuiga o le gataifale o le malo o Amerika le Cutter Harriet Lane i le vaiaso ua mavae ma faatino ana galuega faapuipuiga i le gataifale o le atunuu, o se lagolago lea a Amerika i le taumafaiga a Samoa e faamalosia Tulafono e tapu ai fagotaga faasolitulafono aemaise o le faaaogā o lo tatou ogasami o se auala e faaoo atu ai fualaau faasāina i atunuu o loo fuafua e ave iai.

O Samoa le uafu ua muamua malolo mai iai le faigamalaga a lea vaa, a o taula ai la lea vaa i Apia sa iai foi isi galuega a le auvaa e pei ona latou asia ai le Kolisi a Sagata Maria i Vaimoso, o le Kolisi o Uesele i Faleula, o le nofoaga o tagata matutua i Mapuifagalele ma le falepuipui i Tanumalala mo aso e tolu.

Sa faia foi a latou faafiafiaga faatasi ma le faili a leoleo o Samoa aemaise i le solo i taeao i le sisiina o le tagavai o Samoa e amata ai galuega.

Na ta’ua e le ofisa o le Amepasa o le malo o Amerika i Samoa nei o le a atili faamalosia sootaga ma lea atunuu e ala i le vaa lenei ma ofo mai foi fesoasoani mo Samoa i la latou auaunaga, o loo faatino mo le gataifale o Samoa faapea foi le avanoa mo fanau aoga o loo tauaveina aoaoga faaseila i le Iunivesite o Samoa.