Na faate’ia le to’atele ina ua salalau ai tala ma faasalalauga i luga o auala fesoota’iga televavave poo upega tafa’ilagi o tuua’iga e faia faasaga i le alii faamasino Samoa, Leiataualesā Jerry Brunt e faapea na ia faia se gaioiga lē tautamālii ma le faaālātua ua manumalo ai le tamaitai Tausala o Samoa, Litara Loma Ieremia-Allan i le pale o le Tausala o le Pasefika.  

Sa faate’ia foi le to’atele ina ua māua faamatalaga i le lē mafai ai ona faimalaga ese atu Leiataualesā ma se tasi o faamasino o le tauvaga mai Vanuatu, ina ua taofia i la’ua e ala i se Pepa Taofia poo le Stop Order e le Pulega o Femalagaa’iga, le Immigration a le malo a Solomona.

Ina ua fesiligia le mafua’aga, e le’i mafai ona avatu se faamatalaga tonu ma le mautū e tusa ai ma lea gaioiga.

I lipoti mai le ofisa faasalalau a le Tavuli News – Solomon Islands na faailoa ai le fesiligia o le tonu ma le faamaoni o le gaioiga na faia ai le Pepa Taofia mo sui nei e to’alua.

E fesiligia foi ala o le tulafono na uia ma faatino, ma na fesiligia e le ofisa faasalalau le Ofisa o le Loia Sili le tonu o vaega ua faatino, peitai e le’i fia tali le Loia Sili.

Ina ua fesiligia foi manatu a nisi o loia ma tagata maualuluga e iai tomai i le tulafono, na o latou faailo, e pau le taimi e faatino ai se Pepa Taofia i le malaevaalele, pe afai o loo aafia se tasi i le tulafono, aemaise pe a o iai ni moliaga tugā o loo molia ai o ia ma ua solia ni tulafono faavaomalo.

Ae i lo latou iloiloga o le mataupu e leai se mafua’aga tatau e taofi ai i la’ua nei o loo aafia.

Na ta’ua e loia nei, o mataupu tau i tauvaga a tausala e iloilo lava e i latou e nafa ma le tauvaga ae lē o ni mataupu e aumai i le malo ma le tulafono.  

O loo faaalia i lipoti le lē mautonu o ni faamatalaga a sui o le malo i lenei mataupu.

Na ta’ua e le Minisita o le Home Affairs, Isikeli Vave Jnr o le a  galulue e tuufaatasia se pepa o faamatalaga i le po anapo poo le taeao nei.

Na tali le Loia Sili, John Muria Jnr e tuu atu lava i le malo e latou te faia se pepa o faamatalaga ae ina ua fesiligia le Ofisa o le Palemia, o le tali e leai se pepa o faamatalaga e faia.  

E le’i mafai foi ona tali le Komesina o le Matagaluega o Leoleo pe na taofia faamalosi Leiataualesā ma le faamasino mai Vanuatu po ua iai ni moliaga ua molia ai i la’ua.  

Puna o Faamatalaga: https://www.tavulinews.com.sb/stop-order-legality-solomon-islands/