Ua agai pati o le Itu agai e mataituina faaiugafai a le Palemia i le mae’a o le faamavaega a Kiri Allan mai ona matafaioi faaminisita.
E lei leva nei ona toe foi ane Kiri Allan i ona tofiga i le mae’a o sina taimi na faaaogā e silasila ai i lu’itau sa feagai ai i le itu tau le soifua maloloina o le mafaufau, mental health, lea sa faailoa ai e le Palemia i le taimi lea ua sauni Kiri e toe foi ane i galuega.
O le tulaga lea ua fesiligia nei e le taitai o le National Christopher Luxon, pe aisea na faataga ai e Hipkins le toe foi ane o Kiri.
Na faailoa foi e Luxon ua lē mafai e Hipkins ona faatulaga lelei mea e manaomia mai lana Kapeneta ma o loo iai lava le mea o loo faaletonu i aga ma le taitaiga o le Kapeneta.
O le finagalo faaalia o le taitai o le ACT, David Seymour ua ia ta’ua ai o le taimi nei i le faigamalo e foliga ua leai ni o latou faaleoleo ma ua lē mafai ona faatulaga lelei mai se ‘au o minisita ma ua na ona nonofo ai i tulaga ia e faatalitali ai le faigapalota.
Fai mai Seymour o loo iai le pule a le tulafono, rule of law ma o le tulafono lea afai e faatino ai e le tagata e toatasi galuega e lua ona iai lea o le conflict of interest.
O le tali a le Palemia e pei ona folasia i le lipoti a le One News, silasila ia Dame Annette King lea na lua foi ona tofiga na umia i le faigamalo, a iai ni tulaga e tulai mai e aafia ai ona agai ane lea o le minisita lagolago e faatino le auaunaga.
Mo Kiri Allan o lea ua toe foi atu i le East Coast ae na iai i le Palemene talu mai le 2017 ma i se faamatalaga na faailoa i le aso ananafi ua ta’ua ai o le a agai ese mo sina taimi se’i toe mafaufau i lona lumanai i le polokiki.
