O le tausaga faaletupe fou 2023 i le 2024 ua toe fuafua ai e le Malo se vaegatupe e ‘afa miliona pe lima selau afe tala, e tuuina atu i le faalapotopotoga tuma’oti o le Toomaga mo ē Puapuagatia le Samoa Victim Support Group.

O le tausaga faaletupe o le a mae’a na tuuina atu ai foi e le malo le ‘afa miliona tala i lea lava faalapotopotoga mo galuega faatino ma polokalame e tetee atu ai i sauaga i totonu o aiga aemaise o sauaga faasaga i tina ma tamaitai ma fanau.

Ua faailoa ai e le faipule o Vaimauga Numera Tasi sona atugaluga i le taitaifono o le komiti o tupe a le Palemene le sui faipule o Aleipata Itupa i Lalo, i le toe ave o se isi lima selau afe i le Toomaga, ae o loo saili seleni lea faalapotopotoga mo le faia o lana auaunaga masani i fanau ma ē o loo aafia i sauaga.

Na faamanino e le taitai o le Malo i sona finagalo i le Palemene se tali i atugaluga o le sui usufono o Vaimauga Numera Muamua ma faailoa ai e le afioga i le tamaitai Palemia, e leai se eseesega o fesoasoani tupe a le Malo o loo ave i le Toomaga, ma fesoasoani tupe o loo ave i le Iuni Lakapi a le atunuu, aua e le o taofia ai le iuni i le faia o a latou sailiga tupe.

Faaalia e le Palemia le afioga Fiame Naomi Mataafa, o le aiātatau lea a soo se faalapotopotoga tuma’oti, ma e leai se faiga faavae a le Malo a ave sana fesoasoani i se faalapotopotoga faapea, ona taofia ai lea o le toe saili fesoasoani mo le faaauauina o a latou galuega mo le manuia o tagata lautele.

O loo tapena le faalapotopotoga o le Toomaga mo ē Puapuagatia i sana suegatupe i le faamoemoe e faaauau ai a latou polokalame ma faatupe ai foi isi ana auaunaga aemaise o le totogi o ana tagata faigaluega.