Ua fesiligia e le faamasinoga le māfua’aga na faia ai le faasalalauga faalaua’itele a le Loia Sili a le malo, lea na faasalalau i le vaiaso ua mavae, ona e manatu le afioga i le Faamasino Sili le afioga Satiu Simativa Perese ma le afioga i le faamasino susuga Leiataualesa Darrel Clarke, e foliga e faatatau tonu i le finagalo o le faamasinoga na aumai i le faai’uga o su’esu’ega i le tagi tau palota a Falealili 1, lea ua soloia ai le nofoa i le Palemene o lea itumalo.
Ua manino le faamasinoga, o le Loia Sili a o le’i see atu e tauave lea tofiga maualuga o le malo, sa avea o se tasi o loia mo le afioga Toelupe Maoiautele Poumulinuku Onesemo.
O le faai’uga ua soloia ai le nofoa ma le finagalo o le faamasinoga e ave i le Loia Sili mau o su’esu’ega o le aafiaga o le selau afe tala sa faamoemoe e ave ai i tua le tagi, sa faailoa i le faai’uga o le galuega lea a le Loia Sili ma lona ofisa o le iloilo o mau sa su’esu’eina ma faia se faatatau pe taunuu ai i ni moliaga faasolitulafono.
O le 49 foi o molimau na poloa’iina e oo atu i le faamasinoga ina ua leai nisi e oo atu i le taimi na su’esu’e ai moliaga o le tagi tau palota, e tasi lea o vaega sa tuuina atu e le faamasinoga i le Loia Sili ma lona ofisa e faia iai se iloiloga pe faia iai ni moliaga.
