O le itula e 2 i le aoauli o le Aso Faraile o le vaiaso nei, aso 3 o Me 2024, o le a faatino ai se feiloaiga a le alii faipule ia Teanau Tuiono ma le Pacific Leadership Forum e tusa ai ma le mataupu i sitiseni a tagata Samoa mo Niu Sila e pei ona finau iai le toatele i le taimi nei.
Mo le silafia o loo finauina e le afioga i le alii Faipule i totonu o le Pelemene le faaofi atu i totonu o le pili e toe faafoi ai sitiseni a tagata Samoa na aveesea i lalo o le tulafono na pasia ma faamalosia i le tausaga e 1982 i lalo o le taitaiga a le alii Palemia o Robert Muldoon.
Ua faamauina foi, a’o faasauni ai o Tuiono e faaulu le pili i le tausaga ua mavae, a o lumanai le palota tele sa faailo ai le galulue ai ma le Pacific Leadership Forum mo le lagolago a Samoa i NZ.
O se naunautaiga ina ia mafai ona faatino le galuega.
Ta’ua i lipoti o lea feiloaiga o le a faapea ona feagai le Fono Faufautua a Samoa i Aukilani ma le faafoeina o le polokalame e aofia ai le ‘ava e faafeiloai ai Tuiono.
O le a faapea ona faatino le pitolaau a le auositaulaga e le Mafutaga a Ekalesia Soofaatasi, ae o le Pacific Leadership Forum o le a gafa ma le taitaia o le mataupu.
E momoli ai le agaga faafetai i le Konesula o Samoa i Aukilani, Afioga Afemata Palusalue Faapo II mo le faaavanoaina o le Fale o Samoa e faatino ai lenei feiloaiga tāua.
Faamauina ua lata i le iva masina o feagai le Pacific Leadership Forum ma fesootaiga ma sui o le Palemene e aofia ai le tusi aloaia o le Pacific Leadership Forum i le Palemia Christopher Luxon ma Vaega Faaupufai le National, le Sui Palemia, Vaovasamanaia Winston Peters ma le Vaega Faaupufai le New Zealand First, o le Minisita o Tagata Atumotu ia Shane Reti, o le Minisita o Femalaga’iga, Erica Stanford, o le Minisita o Mataupu Faalotoifale, Brooke van Velden ma le Vaega Faaupufai o le ACT, o le Loia Sili, Judith Collins faatasi ma le tusi i le Peresetene o le New Zealand First.
E ta’ua, ua tatala mai e le taitaifono o le soākomiti a le Palemene (Governance & Administration Committee) le avanoa e tuuina atu ai manatu (submissions) e tusa ma le Restoring Citizenship Removed By Citizenship (Western Samoa) Act 1982 Bill, poo le tulafono tau faaofi e soloia ai le Citizenship (Western Samoa) Act 1982.
Ma o le a mafai ai foi e tagata na faalēaogāina sitiseni Niu Sila i lalo o le Tulafono 1982 ona talosagaina aiātatau e maua ai sitiseni Niu Sila.
O manatu tusitusia pe tuufofoga e tatau ona faaoo atu a o lei mavae le vaeluaga o le aso 31 Me 2024.
O le a faapea ona faasalalau tuusao atu e le tatou ala ata o le Radio Samoa 1593AM lenei fonotaga tāua.
Puna o Faamatalaga: https://www.parliament.nz/en/pb/sc/committees-press-releases/have-your-say-on-the-restoring-citizenship-removed-by-citizenship-western-samoa-act-1982-bill
